«Дублёр күні»

«Дублёр күні» – бұл студенттерге кәсіпорынның жұмысын ішінен танып, тәжірибе жинауға мүмкіндік беретін іс-шара. Мұндай формат ұйымның қалай жұмыс істейтінін басқа қырынан көруге жол ашса, тәжірибелі қызметкерлерге өз міндеттеріне жаңа көзқараспен қарауға жағдай жасайды.

2 қазан күні «Жәлел Қизатов атындағы жоғары ауыл шаруашылығы колледжі» КМҚК студенттері мамандардың жұмысын сырттай бақылап қана қоймай, үдерістерге тікелей қатысу мүмкіндігін алды.

Дублёр күні колледждің әлеуметтік серіктес кәсіпорындарында өтті:
— «Гарагуль Л.И.» ЖК-нің «Юности» кафесінде – «Тамақтануды ұйымдастыру» мамандығының студенттері үшін;
— «Атамекен-Агро» ЖШС-де – «Ауыл шаруашылығын механикаландыру» мамандығының студенттері үшін.

Мұндай іс-шаралар білім беру мен әлеуметтік серіктестердің өзара ықпалдастығын нығайтып, студенттердің кәсіби көкжиегін кеңейтеді. Дублёр күні игі дәстүрге айналды; алдағы уақытта, әсіресе, мамандыққа қызығушылық танытқан студенттерді кеңірек тарту жоспарлануда. Бұл бастама оқу мен өндірістік тәжірибені тиімді ұштастырудың үлгісі болып, колледжді тәмамдамай тұрып-ақ саналы кәсіби таңдау жасауға және алғашқы маңызды дағдыларды қалыптастыруға көмектеседі.